طريقة فتح حساب CIH BANK من الهاتف مجانا وبسهولة (شرح شامل بالدارجة 🇲🇦🔥)
السلام عليكم، اول حاجة بغيت نرحب بيك فهاد المقال لي ماتانضنش شتي بحالو فشي بلاصة😂 المهم نتا خويا ولا نتي اختي بغيتو تفتحو حساب عند CIH BANK ارالي عقلك ركز معايا فهاد المقال باش تعرف الطريقة الصحيحة لفتح حساب CIH BANK!
فاللول انا شخصيا كنت باغي نفتح كونط CIH BANK وماعرفتش كيفاش، وصدقت مشيت تال عندهوم ساعة صدقو ولاد السوق بدلو السيستم وقالولي سيير فتح بتلفونك راه ساهل داكشي وغانتبعو معاك غامن تيليفون😜
كانتفكر ديك خيتي لي استقبلاتني وتاتقولي شوف راه فتح حساب CIH BANK من الهاتف مجاني وساهل 😂 اودي قلت ليها غاقوليلي بلا ماتبرزطني نيشان🤣!
ماعلينا، اسيدي ويالالة اليوم غانوريكوم داكشي بالتفصيل خصك غيتبع معاية شوية بشوية، اه! أجي قبل مانسا، راه كنت درت مقال آخر فيه الطريقة مفصلة مع فيديو تقدر تشوفو منهنا 👇
فتح حساب CIH BANK من الهاتف
فاش دويت على طريقة “فتح حساب بنكي بالمجان على CIH BANK و لحصول على بطاقة MasterCard” كنت فصلت على هدرت على تسجيل الدخول إلى حساب CIH BANK من هاتفي ولعيبات اخرين!
ولكن هنا بغينا نركزو على فتح حساب CIH BANK من التيليفون، وباش دير تانتا بحالي وتفتح حساب CIH فابور وبلا مشاكل ماعليك غير دير هادشي لي التحت 👇
الخطوة رقم 1:
فاللول خصك تحميل تطبيق CIH Mobile من هاد الرابط 👇 ولا من بلاي ستور!
الخطوة رقم 2:
دخل للتطبيق وبرك على Je Deviens Client حيتاش راك جديد.
الخطوة رقم 3:
منبعد برك على فتح حساب Ouvrir un compte.
الخطوة رقم 4:
هنا كتب سميتك ثم الكنية ديالك وابرك على Suivant.
الخطوة رقم 5:
وهنا غاتكتب رقم التلفون ديالك بلاما تكتب 0 حيتاش دايرين ليك +واختار واش عندك اتصالات ولا انوي ولا اورنج وابرك Suivant.
الخطوة رقم 6:
كتب Gmail ديالك لي خدام بيه حيت غايوصلك ميساج فيه وابرك Suivant.
الخطوة رقم 7:
وهنا خصك دير واحد الكود لي ايكون فيه 6 دالارقام ومايكونوش متبعة ولا معاودة، وافق على سياسة الخصوصية وابرك على Suivant.
الخطوة رقم 8:
هنا خاص الايميل ديالك ايكون صحيح باش توتق الحساب برك على Verifier Mon address E-mail.
الخطوة رقم 9:
دبا غايوصلك واحد الكود فجيمايل Gmail.
الخطوة رقم 10:
الكود يقدر ايتعطل شوية، فاش ايوصل دخلو وبرك Valider.
الخطوة رقم 11:
غايجيك كود اخر في رقم الهاتف لي درتيه تاهو دخلو فالتطبيق.
الخطوة رقم 12:
برك على Valider وغاتشوف هاد العلامة برك على Suivant.
الخطوة رقم 13:
هنا خاص توثيق الحساب وخصك تصور لاكارت CIN برك على الكاميرا.
الخطوة رقم 14:
هنا غايسولوك واش عندك لاكارط القديمة ولا الجديدة لي ولات.
الخطوة رقم 15:
اختار لي عندك وبرك Suivant وبرك على السماح Allow او Accepter باش ايقدر التطبيق ايصور.
الخطوة رقم 16:
ماتنساش دير لاكارط فشي بلاصة باينة والضو باش دوز دغيا وتقبل ليك وتبان ديك المعلومات.
الخطوة رقم 17:
قلب لاكارط الجهة الأخرى ودير نفس الشي.
الخطوة رقم 18:
منبعد غاتشوف ان التطبيق دار المعلومات لي فلاكارط غابوحدو، وهاد البلان مزيان كايهنيك.
الخطوة رقم 19:
تأكد من المعلومات وبرك على ديك البارت ديال الصح ثم Suivant.
الخطوة رقم 20:
وهنا خصك دير سيلفي بوجهك وبرك على Suivant.
الخطوة رقم 21:
وري وجهك للكاميرا وحاول تجيبو فالدائرة باش ايشوفك التطبيق.
تنبيه!!
سمع سمع!! خص ضروري الاضائة وبلاصة مزيانة فين تبان تصويرة وحاول تبين الملامح وتكون بحال لاكارط، وقبل مانكمل، ماتنساش تسيفط المقال لصحابك ايستافدو ويضحكو شوية😂 واجي خليني نكتر عليك شوية، درب معاك شي دويرة فالمقال لي لتحت فاش تسالي باش تعرف كيفاش تخدم بالكونط ديالك 👇
الخطوة رقم 22:
منبعد غايقرا الصورة وغاتطابق صورة لاكارت، هنا برك على Suivant.
الخطوة رقم 23:
هنا خصك تعمر شي معلومان، كنت اعزب ولا مزوج ولا شيحاجا اخرى، والتانية دير الجنسية والثالت بلاد الزيادة والأخيرة بلاد الاقامة، بعدها اختار لا Non وبرك Suivant.
الخطوة رقم 24:
عمر المعلومات الخاصة بخدمتك ولا قرايتك لابغيتي، الى مابغيتيش تفادى داكشي ودير لي فالصورة.
الخطوة رقم 25:
الى مابغيتيش تعطي معلوماتك الشخصية دير بحال كيفما ماتايبانلك فالتصويرة.
الخطوة رقم 26:
برك Suivant وغايبانلك العروض لي كاينا اختار CIH CODE 30 الى كنتي ولد.
الخطوة رقم 27:
بالنسبة للبنات اختاري عرض سيدتي المجاني مدى الحياة.
ملاحظة!!
هاد العروض كايبانو على حساب الشخص والمعلومات لي تايعمرها، مثلا لو كنتي شاب مغايعطيكش العرض ديال سيدتي، والى كنتي موظف غايعطيك عروض اخرى…
الخطوة رقم 28:
هنا اخترينا حساب سيدتي حيتاش غانصايبو الكونط لواحد البنت، وماتقلقش غي تبع معايا راه مكاين تا فرق فالخطوات.
الخطوة رقم 29:
ودبا خدم جي پي إس GPRS وغاتعرف علاش منبعد.
الخطوة رقم 30:
هنا غايعاونك باش تبقا مدينتك، ويمكنليك تقلب عليها.
الخطوة رقم 31:
هنا غايوريك الوكالات او البنات ديال سياش لي فمدينتك، اختار الوكالة CIH لي قريبة ليك.
الخطوة رقم 32:
هنا غايوريك العنوان باش تأكد برك Suivant.
الخطوة رقم 33:
دبا غايبغيو ايصونيو لك شي نهار باش ايسولوك شوية وخصك تختار نهار لي بغيتي نتا.
الخطوة رقم 34:
منبعد اختار التوقيت بالضبط في هذا النهار لي اختاريتي.
الخطوة رقم 35:
منبعد غايتاصلو بيك وغايديرو معاك نهار لي تمشي تسني فيه عندهم، برك Suivant.
الخطوة رقم 36:
كايقولك بلي خصك تسيني برك Suivant.
الخطوة رقم 37:
ماعليك غير تسني فالشاشة ديال تيليفون بيديك بحال كيفما كادير الأوراق وبرك Valider.
الخطوة رقم 38:
دبا غايعطيك معلومات ديالك تأكد منها وبرك Suivant.
الخطوة رقم 39:
وافق على شروط الشركة بلي غادير معاهوم فيديو وغايديرو السنية ديالك في الاوراق، برك على ديك ايقونة الصح وبرك Terminer.
الخطوة رقم 40:
هنا غايقولك ان العملية نجحات.
الخطوة رقم 41:
ودبا غاتكون ساليتي المرحلة الأولى ما عليك غير تسنى تايضربو طلة على الملف ديالك.
الخطوة رقم 42:
يقدر ياخد داكشي شوية دالوقت، داكشي علاش غير نوض قضيلك شي شغل ودير حفظ للمقال تاتلقا بلي دازت المرحلة اخرى واجي كمل.
الخطوة رقم 43:
من بعد غايصونيو ليك من البنك وفالغالب على رقم 05 اي الفاكس وخصك تجاوبهوم باش تنسق معاهوم.
الخطوة رقم 44:
فالغالب كايسيفطو رابط فالواتساب وتايقولولك دونالديه باش تدويو أپيل فيديو.
الخطوة رقم 45:
ادخل باش تيليشارجي التطبيق ولا تخدم بيه اونلاين باش دير فيديو معاهم.
الخطوة رقم 46:
كتب سميتك وغاتبان ليهوم باش يتأكدو منك مباشرة بالفيديو، غاتبان واحد شوية فالفيديو صوت وصورة.
الخطوة رقم 47:
منبعد اسيدي غادوز لمرحلة اخرى.
الخطوة رقم 48:
منبعد يومين ولا تلاتة ايسيفطولك رسالة Gmail فيها رقم الرايبي RIB.
الخطوة رقم 49:
كوپي ولا كتب 7 ارقام الأولى من الرقم فشيحاجا.
الخطوة رقم 50:
رجع للتطبيق وبرك على Je me connecte.
الخطوة رقم 51:
برك دبا على Activation.
الخطوة رقم 52:
فالخانة الاولى حط هادوك 7 ارقام الأولى لي نسختيها وفالخانة التانية امتب رقم الهاتف لي درتيه قبل وابرك Next.
الخطوة رقم 53:
اتجيك رسالة على الهاتف فيها كود ايقدر ايتحك نيشان لاكان فنفس تيلي الى جاك فشي تيلي اخر كتبو وابرك Next.
الخطوة رقم 54:
دبا خصك دير واحد الكود لي غاتعقل عليه، ماخصش الأرقام تكون متتابعة ولا متكررة وفيها 6 ارقام حيتاش ايخصك ديما دخل لداك الكود.
الخطوة رقم 55:
هاد الخطوة كايديرلك بحال شي لغز كايعاونك بيه في حالة مانسيتي الكود، مثلا عيد ميلاد جداتك ولا سميتها ولا….
الخطوة رقم 56:
منبعد غايكدليك نجاح العملية.
الخطوة رقم 57:
دبا الدخل التطبيق من الزيرو وغاتبرك على Je me connecte واختار Authentication ودخل 7 ارقام ديال الرايبي دقبيلا والكود ديال 6 ارقام لي فات.
الخطوة رقم 58:
هنا كايقتارح باش تسمحلو يوصل لبلاصة لي نتا فيها، لابغيتي سمحليه فاش تايكون التطبيق خدام ولا لا.
الخطوة رقم 59:
غايوصلك كود فالتيليفون دخلو.
الخطوة رقم 60:
ودبا هاد العملية كاتسما فتح حساب CIH بنجاح وبشكل صحيح.
الخطوة رقم 61:
كاتهنئك الشركة بالحساب وكاتعطيك بعض التعليمات برك ok.
الخطوة رقم 62:
دبا كاقولك دير كود باش تخدمو وبلاما تبقا تجيك ديك الرسالة فاش كادخل الحساب لامابغيتيش ماشي مشكل، لم هاد الخطوة مابقاتش فالتطبيق الجديد.
الخطوة رقم 63:
دبا غاتبانليك واجهة التطبيق فيها الحساب ديالك خاوي مافيه تا درهم😅 وشنو سحابلك اتلقاه عامر زعما 🤣
الخطوة رقم 64:
اتقا واحد السيمانة ولا هكاك غايسيفطولك على حساب كارت ݣيشي.
الخطوة رقم 65:
فاش اتوجد الكارت ݣيشي غايسيفطولك ميساج، سير الوكالة لي ختاريني باش تاخدها، من الأفضل تسنا يومين ولا تلاتة عاد سير حيت شي مرات كايتعطلو ومكاتكونش فداك الوقت لي قالو.
هنا غاتكون كملتي عملية فتح حساب بنكي بالمجان على CIH BANK مجانا، مبروك عليك فتح حساب CIH BANK من الهاتف، مابقالك دبا غاتعمرو بشي فليسات لاعندك😅 ولا ماعندكش دبر فيهوم🤣 غي ضاحك معاك خود راحتك، الحساب ديالك تما ايمتا مابغيتي تحط فيه!
قبل ماتمشي أجي نقولك! الى مكانتش شي فكرة واضحة تقدر تسولني فالتعاليق وغانجاوبك ان شاء الله، وتقدر تشوف الفيديو لي التحت كذلك، وزيد قرأ شوية التحت راه شي لعيبات ضروري تعرفهوم👇👇
شروط فتح حساب CIH BANK
شروط فتح حساب داخل بنك CIH ماشي شيحاجا، غيشي لعيبات من الأفضل تعرفهوم فالحالات الاستثنائية لي تقد تلقا شي شرط معكلك ولا، هادشي لي خصك باش تفتح حساب CIH BANK!
- ماتكونش قل من 18 سنة.
- خص ضروري تحدد الحساب لي بغيتي تفتح.
- ضروري تحت رقم التليفون باش ايتواصلو معاك.
- خاص تكون لاكارد ديالك خدامة وماوافيلهاش الأجل.
- فاش تجيك رسالة بأن كارط ݣيشي خرجات ايخصك تدي لكارط ناسيونال والتليفون لي مدخل فيه الحساب معاك.
صاااافي هادشي لي كاين، ايوا شتي قلت ليك بلاما تشوش راسك، كانحس بحالا مزال مبرزطاك شيحاجا🤔 واش ݣاع الحسابات فابور!؟ تبع تعرف كيفاش البلان 👇
أنواع حسابات CIH
كاين لي سول “هل فتح حساب في CIH مجاني؟” فجنب السؤال “كيف افتح حساب في CIH من الهاتف؟” لي حاولنا عليه، CIH بحال الشركات الاخرى عندها حسابات مجانية وهما:
- حساب CIH للنساء “سيدتي” مجاني مدى الحياة.
- حساب CIH Code 30 مجاني للشباب اقل من 30 عام.
- كاين حساب اخر لي دارتو CIH للناس -18 لي خاصني نديرلكوم عليه شي مقال شي نهار، لابغيتو ندوي عليه هجمو عليا فالتعاليق!
مهم هادو أنواع حسابات CIH لابغيتي فتح حساب بنكي مجانا عند CIH BANK، كاينين حسابات اخرين بزاف لابغيتي ندوي عليهوم مرة أخرى.
مميزات فتح حساب CIH BANK
كاين بزاف ديال المميزات فاش كاتفتح حساب CIH BANK من الهاتف ولا نامت الپيسي لابغيتي، مهم هنا غاندكر شي مميزات باختصار، تبعني…
- تقدر تغير الكود ايمتا مابغيتي.
- تقدر تسيفط وتستقبل الفلوس فالوقت لي بغيتي.
- تقدر تحبس الخدمة بكارت ݣيشي لحالة ماتلفات ليك ولا.
- ايمكنليك دير عمليات مختلفة بالتطبيق وتراجعهوم وتأكد منهوم.
- ايمكنليك تستقبل فلوس من الخارج ولا تسيفطهوم للطلبة تما.
- تقدر تشتري تعبئة، تخلص الما الضو والضرائب ولابونمو وزيد وزيد…
- تقدر تسيفط ولا تستقبل فلوس فأي وقت من أي شخص غير من التطبيق.
- البنك كايمتالك خبرة لاكتر من 100 عام داكشي باش معاناه التجربة ديالو فالمجال.
- زادت وباش الميزة ديال CIH Express ولي تقدر بيها نجبد فلوسك بلا كارت ݣيشي.
- البنك معروفة بالشفافية العالية ديالها خصها غاتزيد شوي دالفروع باشمايبقاش عليها الضغط.
- تقدر تواصل مع المستشارين فالبنك غير من التطبيق ولا دوز الإستشارة فالواتساب ولا بوت مسنجر.
- المزيانة فالبنك تاني هي انه ديما كايطور من الخدمات ديالو فخدمات سياش بنك دغدا تقد تلقاهوم اليوم.
- تقدر تبع الحساب ديالك وتعرف اش فيه وتغطي داكشي دالفلوس لي عندك باشما يشوفهوم حد بالنجيمات “**”.
- تقدر تختار شحال ايكون السحب ديالك غيمن التيليفون صغير ولا كبير وماشي غي 4000 درهم كيفما كادير شي بنوك اخرى.
من بطاقة وحدة تقدر دير بزاف دالعمليات، بحال السحب والشراء من الويب ولا لاكان عندك مع الربح من الانترنت. - لاتحولتي لشي بلاصة وبغيتي تمشي لوكالة لشي غرض ضروري ولكن بعيدة ماتقلقش راه تقدر تغيرها غامن تيليفونك.
تطبيق حساب CIH BANK من الهاتف
التطبيق ديال CIH كايدعم هواتف الاندرويد والايفون وداكشي علاش تقدر تيليشاجيه من بلاي ستور ولا الآب ستور وتفتح حساب CIH BANK من الهاتف لاكنتي كاتسول “كيف افتح حسابي البنكي في الهاتف؟”.
ماعليك غيتابع الخطوات السابقة بلا اخطاء وغاتفتح حساب بنكي في CIH مجاني، كاقدمليك التطبيق ݣاع المميزات لي دويت عليها الفوق والاطلاع على حسابي في CIH BANK، ولكنى من ذلك انه ولات فيه CIH BANK بالعربية.
وحتا لهنا غانكونو سالينا من طريقة فتح حساب CIH BANK من الهاتف، مابقالنا غير نشربو عليها شي كاس داتاي، لا لا خصنا الزردة ݣالا🤣 كونمشيتي السبير كون فتحتيه ب20 درهم عالأقل😂، الحاصول الله ايخلينا ديما ضاحكين وصاف، تا اشمن صاف قولي كيفاش جاك المقال فالتعاليق لامالقيتي علاياش تسول!🔥
